Како изгледа истовремено да продолжуваш семеен бизнис со изградена репутација и да создаваш сопствен бренд од нула? Георги Костадиноски ги познава двете страни на претприемништвото. Како втора генерација во George Rent a Car и основач на El Cabron Wine Bar, тој гради бизниси во две различни индустрии, но врз исти принципи – доверба, квалитетна услуга и искуство што го враќа клиентот повторно.

1. Што те инспирираше да го отвориш El Cabron Wine Bar и каква приказна сакаше да создадеш зад овој концепт?

Отсекогаш сум уживал да собирам луѓе околу една маса. Без разлика дали било дома или во некој ресторан, секогаш ми претставувало задоволство да поканам поголемо друштво, да бидам домаќин и да создадам атмосфера во која сите ќе се чувствуваат пријатно. Мислам дека токму од таму се роди желбата еден ден да имам свој локал.

Патувањата се мојата најголема инспирација. За мене, најголемото богатство е да го прошеташ светот и да учиш од различни култури. Во Италија и Шпанија открив концепт што веднаш ме освои – мали, автентични локали каде не се оди само да се јаде или пие, туку да се ужива. Квалитетна храна во мали порции, одлично вино, пријатна атмосфера и разговор што трае со часови.

Токму тоа искуство сакав да го донесам во Скопје, но со наш потпис. Затоа од самиот почеток ставивме силен акцент на македонските вина. Искрено верувам дека Македонија произведува вина кои заслужуваат место на светската винска сцена и сакав El Cabron да биде место каде луѓето ќе ги откриваат, ќе ги ценат и ќе се гордеат со нив.

2. Денес има многу локали. Што е тоа што го прави El Cabron препознатлив и поразличен од останатите?

Конкуренцијата никогаш не ја гледам како проблем, туку како поттик постојано да се развиваме. Уште од самиот почеток не сакавме да бидеме само уште еден локал, туку место што ќе донесе нешто ново на винската сцена.

Меѓу првите, а верувам и први во Скопје, го воведовме концептот „вино на чаша“ во многу поширок обем. Денес нашите гости имаат можност да изберат од повеќе од 100 различни вински етикети што се служат на чаша. Тоа им овозможува да дегустираат различни стилови и винарии без да мора да нарачуваат цело шише, а истовремено да го прошират своето винско искуство.

Но, она што навистина нè издвојува не е само бројката. Тоа е начинот на кој го доживуваме гостопримството. Во El Cabron секој гостин добива препорака, разговор и внимание. Не сакаме луѓето само да испијат чаша вино и да си заминат – сакаме да откријат нешто ново, да научат нешто за виното и да си заминат со чувство дека биле дел од едно убаво искуство.

Верувам дека токму затоа El Cabron денес не е препознатлив само по вината што ги нуди, туку по атмосферата и искуството што го создава за секој што ќе влезе низ вратата.

3. Покрај сопствениот бизнис, ти си и втора генерација во George Rent a Car. Како изгледа да се продолжи семеен бизнис кој веќе има изградено репутација?

Мислам дека кога продолжуваш семеен бизнис, стартуваш со одредена предност, но и со уште поголема одговорност. Предноста е што наследуваш бренд кој со години ја градел довербата кај клиентите. Но, токму затоа имаш обврска секој ден да докажуваш дека ја заслужуваш таа доверба.

George Rent a Car не ја изгради својата репутација преку ноќ. Таа е резултат на години посветена работа, чесен однос кон клиентите и исполнување на секое ветување. Мојата цел никогаш не била само да го продолжам тоа што е создадено, туку да го подигнам на уште повисоко ниво.

Верувам дека секоја генерација има своја улога. Првата го создава брендот, а следната треба да го модернизира, да воведе нови стандарди и да го подготви за иднината, без притоа да ги изгуби вредностите врз кои е изграден. За мене, тоа е вистинското значење на наследување успешен семеен бизнис.

4. Што е најголемата лекција што ја научи од твојот татко за водење успешен бизнис?

Најголемата лекција што ја научив од татко ми е дека во бизнисот најважни се интегритетот и доследноста. Ако еднаш дадеш збор, мора да стоиш зад него, дури и кога тоа значи дека во тој момент нема да оствариш профит.

Втората работа што ја научив е никогаш да не му кажеш на клиентот: „Не можеме.“ Дури и кога ќе побара услуга што не е дел од нашето секојдневно работење, секогаш бараме решение. Ако не можеме сами да ја реализираме, ќе најдеме партнер, ќе организираме или ќе направиме сè што е во наша моќ за да му помогнеме. Клиентот треба да почувствува дека има партнер на кој може да се потпре, а не компанија што само изнајмува автомобили.

Верувам дека токму таквиот пристап ја создава лојалноста. Клиентите не се враќаат затоа што еднаш добиле добра цена, туку затоа што знаат дека секогаш ќе најдат решение и дека нивниот збор и нашиот збор имаат иста тежина.

5. Како успеваш истовремено да развиваш два различни бизниси – еден во угостителството, а друг во рент-а-кар индустријата?

Не е едноставно паралелно да се развиваат два бизниси. Тоа бара многу време, посветеност и секојдневно носење одлуки. Но, иако станува збор за две различни индустрии, суштината е иста – квалитетна услуга, доверба и континуирано подобрување.

Најважно е да изградиш тим што ќе ја дели истата визија и ќе го одржува нивото на квалитет што клиентите го очекуваат од тебе. Верувам дека успехот на еден бизнис не зависи само од сопственикот, туку од луѓето што секојдневно го претставуваат брендот.

Мојата задача е да ја поставам насоката, да ја пренесам визијата и да создадам систем во кој секој знае што се очекува од него. Кога имаш таков тим и таква организација, можеш истовремено да развиваш повеќе бизниси без да правиш компромис со квалитетот.

6. Кој бизнис те научи повеќе како претприемач – El Cabron или George Rent Car?

Не би можел да изберам, затоа што секој ме научи различни, но подеднакво важни лекции. George Rent Car ме научи дека довербата, дисциплината и долгорочната визија се темел на секој успешен бизнис. El Cabron, од друга страна, ми покажа колку се важни брендот, емоцијата и искуството што му го создаваш на клиентот. Денес не ги гледам како два одделни бизниси, туку како две различни училишта кои ме обликуваа како претприемач. Без едното, немаше да бидам истиот лидер во другото.